ICC ටෙස්ට් පන්දු යවන්නන්ගේ නවතම ශ්‍රේණිගත කිරීම්වල ලොව අංක එකේ ටෙස්ට් පන්දු යවන්නා බවට ඕස්ට්‍රේලියානු වේග පන්දු යවන ක්‍රීඩක මිචෙල් ස්ටාර්ක් පත්ව තිබෙනවා.
බංග්ලාදේශයට එරෙහිව මැකේහි පැවැති දෙවැනි ටෙස්ට් තරගයේදී විශිෂ්ට පන්දු යැවීමක නිරත වූ ස්ටාර්ක් එම තරගයේදී කඩුලු 10ක් දවාගත්තා.
එහිදී ඔහු පළමු ඉනිමේදී ලකුණු 12කට කඩුලු 6ක් සහ දෙවැනි ඉනිමේදී ලකුණු 39කට කඩුලු 4ක් ලබාගත්තා.
එම දස්කම් හේතුවෙන් තරගයේ වීරයා මෙන්ම තරගාවලියේ වීරයා සම්මානයත් ස්ටාර්ක්ට හිමි වුණා.
විශේෂත්වය වන්නේ ටෙස්ට් පන්දු යවන්නන්ගේ ශ්‍රේණිගත කිරීම්වල අංක එක ස්ථානයට ස්ටාර්ක් පැමිණි පළමු අවස්ථාව මෙය වීමයි.
ඔහු මාස දෙකක් පුරා අංක එකේ සිටි ඉන්දීය සුපිරි වේග පන්දු යවන්නා වන ජස්ප්‍රිට් බුම්රා පසුකර යාමට සමත් වුණා.
මැකේහිදී ලබාගත් කඩුලු 10ත් සමඟ ස්ටාර්ක් ටෙස්ට් ඉතිහාසයේ වැඩිම කඩුලු ලාභීන් අතර 10 වැනි ස්ථානයටත් පැමිණ තිබෙනවා.
ඔහු මේ වන විට ටෙස්ට් කඩුලු 445ක් ලබාගෙන ඇති අතර, මීට පෙර 439ක් ලබාගෙන සිටි දකුණු අප්‍රිකානු වේග පන්දු යවන්නා ඩේල් ස්ටේන් පසුකර යාමටත් සමත් වුණා.
