ආබාධ තත්ත්වයන් හේතුවෙන් ඉන්දියාවට එරෙහි ටෙස්ට් තරගාවලියට සහභාගී වීමට නොහැකි වූ කුසල් මෙන්ඩිස් සහ පැතුම් නිස්සංක, එංගලන්තයට එරෙහිව පැවැත්වීමට නියමිත සීමිත පන්දුවාර තරගාවලිය සඳහා යළිත් ශ්රී ලංකා සංචිතයට එක්වීමට නියමිත බව වාර්තා වනවා.
දිගු කලක් ශ්රී ලංකා පිතිකරණයේ ප්රධාන තුරුම්පු දෙකක් වූ මෙම ක්රීඩකයන් දෙදෙනාගේ නැවත පැමිණීම, එංගලන්තයට එරෙහි තරගාවලියට පෙර ශ්රී ලංකා කණ්ඩායමට ලැබෙන වැදගත් ශක්තියක් ලෙස සැලකිය හැකියි.
කුසල්ගේ අත්දැකීම් සහ මැදපෙළේ දායකත්වයත්, පැතුම්ගේ ආක්රමණශීලී ආරම්භයත් ශ්රී ලංකා පිතිකරණයට යළිත් විශාල බලයක් එක් කරනු ඇතැයි බලාපොරොත්තු විය හැකියි.
මේ අතර චරිත් අසලංක, දසුන් ශානක, ළහිරු උදාර, තරිඳු රත්නායක සහ සචින්දු කොළඹගේ වැනි ක්රීඩකයන්ටද සංචිතයේ අවස්ථා හිමිවීමට නියමිත බව වාර්තා වීමත් සමඟ ශ්රී ලංකා කණ්ඩායමේ සංයුතිය පිළිබඳව දැන් වැඩි අවධානයක් යොමුව තිබෙනවා.
එංගලන්තයට එරෙහිව පැවැත්වීමට නියමිත සීමිත පන්දුවාර තරගාවලිය සඳහා ශ්රී ලංකා සංචිතයට දේශීය පිටියේ දක්ෂතා දැක්වූ ක්රීඩකයන් කිහිපදෙනෙකු එක්වීමට නියමිත බව වාර්තා වනවා.
LPL තරගාවලියේ වැඩිම ලකුණුලාභියා වූ ළහිරු උදාර T20I සංචිතයට එක්වීමට නියමිතයි. මෙවර LPL තරගාවලියේ ඉනිම් 9කදී ලකුණු 434ක් රැස් කරමින් ඔහු පිතිකරණයෙන් විශිෂ්ට දක්ෂතා දැක්වූවා.
එමෙන්ම දෙඅත් භාවිතයෙන් පන්දු යැවීමේ සුවිශේෂී හැකියාවක් ඇති දඟ පන්දු යවන ක්රීඩක තරිඳු රත්නායකටත් T20I සංචිතයේ අවස්ථාවක් හිමිවීමට නියමිතයි.
මේ අතර දේශීය තරග පිටියේ දක්ෂතා දැක්වූ ලෙග්-ස්පින් ක්රීඩක සචින්දු කොළඹගේට පළමු වරට ODI සංචිතයේ දොරටු විවෘත වී තිබෙනවා.
මේ නවකයන්ගේ පැමිණීමත් සමඟ ශ්රී ලංකා කණ්ඩායමට නව දක්ෂතා සහ විවිධත්වයක් එක්වන අතර, එංගලන්තයට එරෙහි තරගාවලිය ඔවුන්ට ජාත්යන්තර පිටියේ තමන්ගේ හැකියාව පෙන්වීමට ලැබෙන විශාල අවස්ථාවක් වනු ඇති.
