මෙවර පන්දුවාර විස්සයි20 ලෝක කුසලානයේ සුපිරි අට දෙනාගේ වටයේ ශ්රී ලංකාව සහභාගි වන දෙවන තරගය නවසීලන්තයට එරෙහිව කොළඹ ආර් ප්රේමදාස ක්රීඩාංගණයේදී අද (25) රාත්රී 7ට පැවැත්වෙයි.
අවසන් පූර්ව වටය පිළිබඳ බලාපොරොත්තු රඳවා ගැනීමට නම් ශ්රී ලංකාව මෙම තරගය අනිවාර්යයෙන්ම ජය ගතයුතුය.
මෙම තරගයේද සියලු ප්රවේශපත් අලෙවි වී අවසන් ඇති බැවින් ප්රේමදාස ක්රීඩාංගණයේ පිවිසුම් දොරටු පස්වරු 4ට විවෘත කෙරෙන බව ශ්රී ලංකා ක්රිකට් ආයතනය නිවේදනය කළේය.
මෙවර විස්සයි20 ලෝක කුසලාන ක්රිකට් තරගාවලියේ සුපිරි අට දෙනාගේ වටයේ ශ්රී ලංකා පිල සහභාගි වූ පළමු තරගය එංගලන්තය හමුවේ ලකුණු 51කින් පරාජය පත්වුණි.
මේ හේතුවෙන් ශ්රී ලංකාව අවසන් පූර්ව වටයට බලාපොරොත්තු රඳවා ගැනීමට නම් නවසීලන්තයට එරෙහිව අද පැවැත්වෙන තරගය අනිවාර්යෙන්ම ජය ගත යුතුය.
මෙම තරගය වෙනුවෙන් දෙපිලම ඊයේ කොළඹ ආර් ප්රේමදාස ක්රීඩාංගණයේදී පුහුණුවීම්වල නිරත වුණි.
ශ්රී ලංකාව සහ නවසීලන්තය අතර මේ දක්වා පන්දුවාර විස්සයි20 තරග 28ක් පවත්වා ඇති අතර ඉන් තරග 16ක් නවසීලන්තය ජය ගනිද්දී ශ්රී ලංකාව තරග 9ක් ජය ගෙන ඇත.
ශ්රී ලංකාව සහ නවසීලන්තය අතර පන්දුවාර විස්සයි20 ලෝක කුසලාන තරග 6ක් පවත්වා ඇති අතර ඉන් තරග 3ක් නවසීලන්තය ජය ගත් අතර ශ්රී ලංකාව තරග 2ක් ජය ගැනීමට සමත්වුණි.
මේ අතර අද පැවැත්වෙන ශ්රී ලංකාව සහ නවසීලන්තය තරගය වෙනුවෙන් විශේෂ රථ වාහන සැලැස්මක් ක්රියාත්මක කෙරෙන බව පොලීසිය පවසයි.
මෙම තරගය නැරඹීමට විශාල ප්රේක්ෂක පිරිසක් පැමිණෙනු ඇතැයි අපේක්ෂා කරන බැවින් ඊට අදාළව විශේෂ රථ වාහන සැලැස්මක් ක්රියාත්මක කිරීමට පොලීසිය මේ වන විට තීරණය කර ඇත.
